Повик за учесници на Осма школа за европски политики

Тема на Школата: Животна средина и климатски промени – 27 преговарачко поглавје на Македонија со Европската Унија

Школата за европски политики е традиционална активност на Евротинк која се одржува секоја година. Целта на настанот е да придонесе кон подобро разбирање на процесот на ЕУ интеграции помеѓу претставниците на граѓанските организации, медиумите и други чинители.

Темата на годинешната школа произлезе како највисок интерес и приоритет  на граѓаните. Евротинк ова сознание го доби од серијата спроведени 16 тематски тренинзи, реализирани во текот на 2024 и 2025 година во рамки на истиот проект.

Во фокусот ќе бидат ставени потребните чекори кои треба да се преземат во Македонија за овие прашања да добијат поголемо внимание и конкретни интервенции, особено во контекст на постојаното воздушно загадување, управувањето со отпадот во урбаните средини, чистотата на реките и подигнувањето на јавната свест и култура кај граѓаните. Особено внимание ќе биде посветено на европската димензија на овие теми, имајќи предвид дека тие претставуваат суштински дел од Поглавјето 27 во преговорите на нашата земја со Европската Унија, кое се однесува на животната средина и климатските промени.

За кого е наменета:

Школата е отворена за претставници на граѓански организации и институции, новинари, медиумски работници, студенти и млади професионалци кои се заинтересирани за животната средина и климатските промени во државата.

Период и начин на имплементација:

Школата за европски политики ќе биде реализирана на 23 и 24 декември (вторник и среда) 2025 година, во Хотел Карпош, Скопје. За селектираните учесници Евротинк ќе ги покрие патните трошоци и сместувањето.

Опфат и придобивки:

• Учесниците на школата ќе имаат можност да ги надградат своите знаења на теми поврзани со усогласеноста на Македонија со Европската Унија во однос на преговарачкото поглавје 27, животната средина и климатските промени.
• Како предавачи на школата ќе бидат ангажирани еминентни меѓународни и национални експерти, со специфични портфолија за темата.
• Сите учесници кои ќе остварат учество на најмалку 80% од вкупното времетраење на Школата ќе добијат сертификати за успешно завршување.
• Предавањата ќе бидат одржувани на македонски јазик.

Сите останати детали и информации ќе бидат дополнително споделени со селектираните учесници.

Начин на пријавување и селекција:

Заинтересираните учесници треба да испратат работна биографија (ЦВ) и мотивациско писмо и двете на англиски јазик, на е-маил адресата [email protected] до 12 декември 2025 година, до 16:00 часот.

Евротинк ќе ги селектира и извести учесниците најдоцна до:16 декември 2025 година.

 

Годинешното издание на Школата за европски политики се спроведува во рамки на проектот “Медиумите за ЕУ” – Програма на граѓанското општество за учество на медиумите во преговорите за членство на Северна Македонија во ЕУ, кој Евротинк – Центар за европски стратегии го спроведува во партнерство со АЛДА – Европската асоцијација за локална демократија и БИРС – Балкански институт за регионална соработка со поддршка на Европската Унија и Ана Линдт Фондација.