Mali Sharr nuk lë kënd pa mahnitur. Bukuritë që ofron ky masiv joshin shumë vizitorë që kërkojnë të jenë në harmoni me natyrën, qoftë për disa çaste. Ajri i pastër, peizazhet magjepsëse, majat e larta dhe liqenet e këtij mali i bëjnë vizitorët të lidhen përjetësisht me Sharrin.
Këtu mund të takosh njerëz që kanë profile dhe lidhje të ndryshme me malin. Ajo që i bashkon është se të gjithë e kanë të lidhur ngushtë ekzistencën e tyre me atë të malit, me pasuritë dhe bukuritë e pafundme që duhet mbrojtur. Ata gjithashtu përkrahin shpalljen e Malit Sharr park nacional, ndërkohë që flasin edhe për përfitimet e shumta.
Ky masiv malor, që në vete fsheh bukuritë më të virgjëra të natyrës, është duke u zhvilluar edhe në një model biznesi që sjell turistë të shumtë. Natyra e tij e bukur tërheq jo vetëm vizitorë nga vendi, por edhe nga rajoni dhe Evropa. Sipas të dhënave statistikore, mbi 30 mijë turistë çdo vit frekuentojnë Rajonin e Pollogut. Pjesa më e madhe e tyre kanë për destinacion kryesor pikërisht Sharrin. Pronarët e restoranteve thonë se ka rritje të numrit të turistëve nga vendi dhe jashtë, ndërkohë që shpalljen e Malit Sharr park nacional e shohin si një mundësi për fuqizimin e turizmit malor.
Pikërisht, zhvillimi i turizmit malor dhe benifitet tjera që do vijnë nga shpallja e Malit Sharr park nacional, janë në fokusin e filmit dokumentar “ Sharri- perla e turizmit malor”, i cili vjen si produkt medial në kuadër të projektit “ Mali Sharr-diga e fundit kundër katastrofës natyrore”, i mbështetur nga Civica Mobilitas.
Në linkun e mëposhtëm mund ta ndiqini dokumentarin multimedial të realizuar nga BIRC.
