PREJ PODGORICE NË SHKUP: TË RINJTË SI MOTORË TË NDRYSHIMEVE EVROPIANE

Në kontekstin e integrimeve rajonale, termi evropeizim nuk nënkupton vetëm përafrim me legjislacionin e Bashkimit Evropian – ai nënkupton shumë më tepër.

Shkruan: Sara Neshkoska

Evropeizimi nënkupton pranimin e vlerave si sundimi i ligjit, liria e mediave, të drejtat e njeriut, por edhe pjesëmarrjen aktive të qytetarëve – veçanërisht të rinjve – në të gjitha proceset shoqërore.

Të rinjtë sot kanë potencial jo vetëm të mbështesin vizionin e dikujt tjetër, por edhe vetë të jenë vizionarë. Pikërisht për këtë arsye, pjesëmarrja e të rinjve në procesin e evropeizimit të Ballkanit Perëndimor nuk duhet të jetë simbolike, por thelbësore. Duhet të dëgjohen idetë e tyre, shqetësimet, por edhe propozimet për të ardhmen në të cilën ata vetë do të jetojnë.

Si një nga katër përfaqësuesit e rinj nga Maqedonia, pata mundësinë të marr pjesë në konferencën e parë në kuadër të projektit rajonal TË RINJTË për evropeizimin e Ballkanit Perëndimor, e cila u mbajt më 7 korrik në Podgoricë, Mal i Zi.

Ngjarja u zhvillua në gjuhën angleze dhe mblodhi të rinj nga Maqedonia, Kosova dhe Mali i Zi. Unë isha pjesë e panelit si folëse në një temë që është veçanërisht e afërt për mua: “Të gjithë ne të rinjtë, së bashku për evropeizimin e Ballkanit Perëndimor.”

Pjesëmarrja në konferencë më dha mundësinë jo vetëm të flas, por edhe të dëgjoj – nga liderë të rinj, aktivistë, gazetarë dhe analistë nga rajoni. Të gjithë ndamë një ndjenjë të përbashkët: se vendet tona janë në të njëjtin rrugëtim, me sfida të ngjashme dhe me shpresa të njëjta. Për ne, Evropa nuk është vetëm një koncept gjeografik – por një sistem vlerash ku duam të bëjmë pjesë.

Veçanërisht i rëndësishëm ishte prania e profesionistëve me përvojë nga fusha e mediave, komunikimeve dhe politikave evropiane. Ata na ndihmuan ta kuptojmë procesin nga kënde të ndryshme: politike, shoqërore, por edhe komunikative. Mësimi prej tyre, ashtu si edhe diskutimet mes vetë pjesëmarrësve, ishin përvoja të vlefshme që do t’i mbaj me vete edhe më tej.

Kjo konferencë është vetëm fillimi. Pason forumi rinor në Prishtinë më 25 gusht, ndërsa konferenca përmbyllëse do të mbahet në Shkup në shtator, ku ne nga Maqedonia do të jemi mikpritës. Kjo do të jetë një mundësi jo vetëm për të vazhduar dialogët, por edhe për të treguar rezultatet e punës dhe vizionit tonë të përbashkët.

Evropeizimi nuk është një proces që ndodh “nga lart-poshtë”. Ai ndodh pikërisht përmes iniciativave të tilla, përmes energjisë rinore, përmes lidhjes rajonale dhe përmes ndërtimit të besimit mes të rinjve. Evropa nuk është vetëm një destinacion – ajo është një kulturë e të mësuarit, e dialogut dhe e përparimit të përbashkët. Dhe ne, të rinjtë, duhet të jemi pararendësit e këtij procesi.

Ky tekst është përgatitur në kuadër të projektit Përfshirja rinore për evropeizimin e Ballkanit, i zbatuar nga Instituti BIRC nga Maqedonia e Veriut, OJQ GLAS nga Mali i Zi dhe CFID nga Kosova, me mbështetjen e Fondit për Ballkanin Perëndimor dhe bashkëfinancim nga Bashkimi Evropian.

Ky botim është realizuar me ndihmën financiare të Bashkimit Evropian. Përmbajtja e tij është përgjegjësi e vetme e autorit dhe në asnjë mënyrë nuk mund të konsiderohet se pasqyron qëndrimet e Bashkimit Evropian.